ສູນບໍລິການຂໍ້ມູນຂ່າວສານແບບເອເລັກໂຕຼນິກ ພະແນກ ປທສ ແຂວງໄຊສົມບູນ ຈັດຝຶກອົບຮົມ ຢູ່ເມືອງຮົ່ມ ວັນທີ 20-24 ສິງຫາ 2018

     ໃນລະຫວ່າງ ວັນທີ 20 - 24 ສິງຫາ 2018 ທີ່ຜ່ານມາ, ສູນບໍລິການຂໍ້ມູນຂ່າວສານແບບເອເລັກໂຕຼນິກ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ໄດ້ຈັດຝຶກອົບຮົມ ໃນຫົວຂໍ້: ການນໍາໃຊ້ Microsoft Office (Word, Excels) 2013 ລະດັບກາງ, ການແກ້ໄຂບັນຫາຄອມພິວເຕີ, ການເຊື່ອມຕໍ່ໂປຼແກຼມໂທລະສັບ ເຂົ້າຄອມພິວເຕີ ເຊັ່ນ: CAMSCANNER ແລະ Whatsapp. ໃຫ້ພະນັກງານ - ລັດຖະກອນ ແຕ່ລະຫ້ອງການ, ອົງການ ຢູ່ທີ່ເມືອງຮົ່ມ, ໂດຍການເປັນປະທານຮ່ວມຂອງ ທ່ານ ພູແກ້ວ ອິນທະວົງ ຫົວໜ້າພະແນກໄປສະນີ, ໂທລະຄົມມະນາ ຄົມ ແລະ ການສື່ສານ ແຂວງໄຊສົມບູນ ແລະ ທ່ານ ບຸນເລີດ ລໍ່ ຮອງເຈົ້າເມືອງໆ ຮົ່ມ, ມີຜູ້ເຂົ້າຮ່ວມ ທັງໝົດ ຈໍານວນ 53 ຄົນ, ຍິງ 13 ຄົນ.
     ຈຸດປະສົງເພື່ອພັດທະນາບຸກຄະລາກອນຢູ່ຂັ້ນເມືອງ ຈາກລະດັບພື້ນຖານອັບຂື້ນເປັນລະດັບກາງ ໃຫ້ມີຄວາມເຂັ້ມແຂງດ້ານ ICT ໃຫ້ສາມາດເປັນເສນາທິການທີ່ດີ ໃຫ້ແກ່ການຈັດຕັ້ງຂອງຕົນທີ່ສັງກັດ ໃນຕໍ່ໜ້າ, ທີ່ຄະນະພັກ, ຄະນະນຳ, ພະນັກງານ - ລັດຖະກອນ ຂອງພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງໄຊສົມບູນ ທີ່ໄດ້ນໍາເອົາບົດຮຽນ, ຄວາມຮູ້, ປະສົບການກ່ຽວກັບວຽກງານ ໄອຊີທີ ມາຝຶກສອນໃຫ້ພະນັກງານລັດຖະກອນຂອງເມືອງຮົ່ມ ຈະເຮັດໃຫ້ພະນັກງານເມືອງຮົ່ມໄດ້ຄວາມຮູ້ອັນໃຫມ່ໄປໝູນໃຊ້ໃນວຽກງານຕົວຈິງ. ພ້ອມທັງໄດ້ເຜີຍແຜ່ ຄວາມຮູ້ກ່ຽວກັບການນຳໃຊ້ ສື່ສັງຄົມອອນໄລ໌ ເພື່ອເປີດກວ້າງການ ນໍາໃຊ້ລະບົບ ການສື່ສານໃຫ້ຖືຕ້ອງ ເຊັ່ນ: ການແຊຣ໌,ການໂພສ,ການເຜີຍແຜ່...
     ຜ່ານການຝຶກອົບຮົມໃນຄັ້ງນີ້ເຫັນວ່າ ບັນດານັກສຳມະນາກອນໄດ້ເອົາໃຈໃສ່ເຂົ້າຮ່ວມ ແລະ ຕິດຕາມການນຳສະເໜີບົດ, ຕິດຕາມບົດຮຽນດ້ວຍຄວາມເອົາໃຈໃສ່ເຮັດໃຫ້ນັກສຳມະນາກອນ ໄດ້ຮຽນຮູ້ບົດຮຽນໃໝ່ໆຫຼາຍດ້ານ, ພ້ອມທັງໄດ້ແກ້ໄຂຂໍ້ຂ້ອງໃຈຕ່າງໆທີ່ເຄີຍພົບເຫັນ ແລະ ພົບບັນຫາຄອມພິວເຕີໄດ້ຫຼາຍພໍສົມຄວນ, ສະເລ່ຍແລ້ວສາມາຮັບເອົາ ຄວາມຮູ້ຈາກການຝຶກອົບຮົມໄດ້ 86%.
     ເວລາ 10:00 ໂມງ ຂອງວັນທີ 24 ສິງຫາ 2018, ໄດ້ສຳເລັດການຝຶກອົບຮົມຕາມກຳນົດເວລາ ຈາກນັ້ນ ຄະນະ ຮັບຜິດຊອບການຝຶກອົບຮົມໄດ້ຂື້ນລາຍງານສະພາບການຝຶກອົບຮົມ, ໂດຍເຫັນວ່ານັກສຳມະນາກອນແມ່ນມິ ຄວາມເອົາໃຈໃສ່ຄົ້ນຄວ້າຮ່ຳຮຽນ, ປະຕິບັດໂມງເວລາໄດ້, ພ້ອມທັງຈັດພິທີມອບໃບຢັ້ງຢືນ ການຝຶກອົບຮົມ ໂດຍ ທ່ານ ພູແກ້ວ ອິນທະວົງ ຫົວໜ້າ ພະແນກ ປທສ ແຂວງ ໄຊສົມບູນ.
     ຫຼັງຈາກນັ້ນ ທ່ານ ບຸນເລີດ ລໍ່ ຮອງເຈົ້າເມືອງໆ ຮົ່ມ, ໄດ້ໃຫ້ກຽດມີຄຳເຫັນໂອ້ລົມ ຕໍ່ພິທິີການຝຶກອົບຮົມ, ພ້ອມທັງຮຽກຮ້ອງໃຫ້ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ສືບຕໍ່ນຳເອົາຄວາມຮູ້ ແລະ ປະສົບການອັນໃໝ່ເພື່ອມາຖ່າຍທອດໃຫ້ເມືອງຮົ່ມ ໃນແຕ່ລະໄລຍະໃຫ້ຕໍ່ເນື່ອງ ແລະ ກ່າວປິດພິທີ ຝຶກອົບຮົມ ຢ່າງເປັນທາງການເວລາ 11:00 ໂມງ.
ພັດທະນາໂດຍ: ສູນບໍລິຫານລັດດ້ວຍເອເລັກໂຕຼນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ອີເມວ: mptwebmaster@mpt.gov.la, ໂທ: 021-316600.
ຄູ້ມຄອງ ແລະ ບໍລິການໂດຍ: ສູນຂໍ້ມູນຂ່າວສານແບບເອເລັກໂຕຼນິກແຂວງໄຊສົມບູນ, ອີເມວ: xaysomboun_ict@hotmail.com, ໂທ: 026-210015.