ສູນບໍລິການຂໍ້ມູນຂ່າວສານແບບເອເລັກໂຕຼນິກ ພະແນກ ປທສ ແຂວງໄຊສົມບູນ ຈັດຝຶກອົບຮົມ ຢູ່ເມືອງທ່າໂທມ ວັນທີ 13-16 ສິງຫາ 2018.

     ໃນລະຫວ່າງ ວັນທີ 13- 16 ສິງຫາ 2018 ທີ່ຜ່ານມາ, ສູນບໍລິການຂໍ້ມູນຂ່າວສານແບບເອເລັກໂຕຼນິກ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ໄດ້ຈັດຝຶກອົບຮົມ ໃນຫົວຂໍ້: ການນໍາໃຊ້ Microsoft Office (Word, Excels) 2013 ພື້ນຖານ, ການແກ້ໄຂບັນຫາຄອມພິວເຕີ ພື້ນຖານ,      ການເຊື່ອມຕໍ່ໂປຼແກຼມໂທລະສັບ ເຂົ້າຄອມພິວເຕີ ເຊັ່ນ: CAMSCANNER ແລະ Whatsapp. ໃຫ້ພະນັກງານ - ລັດຖະກອນ ແຕ່ລະຫ້ອງການ, ອົງການ ຢູ່ເມືອງທ່າໂທມ, ໂດຍການເປັນປະທານຮ່ວມຂອງ ທ່ານ ຄຳສຸ ຜົງສະໄໝ ຮອງ ຫົວໜ້າພະແນກໄປສະນີ, ໂທລະຄົມມະນາ ຄົມ ແລະ ການສື່ສານ ແຂວງໄຊສົມບູນ ແລະ ທ່ານ ສົມບູນ ສອນລິດທິເດດ ກຳມະການພັກແຂວງ, ເລຂາພັກເມືອງ, ເຈົ້າເມືອງ ເມືອງທ່າໂທມ, ມີນັກສໍາມະນາກອນ ແລະ ຄູຝຶກຈາກພະແນກ ປທສ ແຂວງ ເຂົ້າຮ່ວມ ທັງໝົດ ຈໍານວນ 80 ຄົນ, ຍິງ 36 ຄົນ, ຄູຝຶກ, ຄະນະຮັບຜິດຊອບ ຈາກພະແນກ ປທສ ແຂວງ ແລະ ຫ້ອງວ່າການ ເມືອງທ່າໂທມ ລວມທັງໝົດ ຈຳນວນ 8 ທ່ານ.
     ຈຸດປະສົງເພື່ອພັດທະນາບຸກຄະລາກອນຢູ່ຂັ້ນເມືອງ ໃຫ້ມີຄວາມເຂັ້ມແຂງດ້ານ ICT ໃຫ້ສາມາດເປັນເສນາທິການທີ່ດີ ໃຫ້ແກ່ການຈັດຕັ້ງຂອງຕົນທີ່ສັງກັດ ໃນຕໍ່ໜ້າ, ຄະນະພັກ, ຄະນະນຳ, ພະນັກງານ - ລັດຖະກອນ ຂອງສູນບໍລິການຂໍ້ມູນຂ່າວສານແບບເອເລັກໂຕຼນິກ ກໍ່ຄື ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງໄຊສົມບູນ ທີ່ໄດ້ນໍາເອົາບົດຮຽນ, ຄວາມຮູ້, ປະສົບການກ່ຽວກັບວຽກງານ ໄອຊີທີ ມາຝຶກສອນໃຫ້ພະນັກງານລັດຖະກອນຂອງເມືອງທ່າໂທມ ຈະເຮັດໃຫ້ພະນັກງານເມືອງທ່າໂທມໄດ້ຄວາມຮູ້ອັນໃຫມ່ໄປໝູນໃຊ້ໃນວຽກງານຕົວຈິງ. ພ້ອມທັງໄດ້ເຜີຍແຜ່ ຄວາມຮູ້ກ່ຽວກັບການນຳໃຊ້ ສື່ສັງຄົມອອນໄລ໌ ເພື່ອເປີດກວ້າງການ ນໍາໃຊ້ລະບົບ ການສື່ສານໃຫ້ຖືຕ້ອງ ເຊັ່ນ: ການແຊຣ໌,ການໂພສ,ການເຜີຍແຜ່...
    ຜ່ານການຝຶກອົບຮົມໃນຄັ້ງນີ້ເຫັນວ່າ ບັນດານັກສຳມະນາກອນໄດ້ເອົາໃຈໃສ່ເຂົ້າຮ່ວມ ແລະ ຕິດຕາມການນໍາສະ ເໜີບົດ, ຕິດຕາມບົດຮຽນດ້ວຍຄວາມເອົາໃຈໃສ່ເຮັດໃຫ້ນັກສຳມະນາກອນທັງຫຼາຍໄດ້ຮຽນຮູ້ບົດຮຽນໃໝ່ໆຫຼາຍດ້ານ, ພ້ອມທັງໄດ້ແກ້ໄຂຂໍ້ຂ້ອງໃຈຕ່າງໆທີ່ເຄີຍພົບເຫັນ ແລະ ພົບບັນຫາຄອມພິວເຕີໄດ້ຫຼາຍພໍສົມຄວນ, ໄດ້ມີໂອກາດ ສົນທະນາຖາມ - ຕອບ, ແລກປ່ຽນຄໍາຄິດຄໍາເຫັນກັນລະຫວ່າງຄູຝຶກ ແລະ ນັກສໍາມະນາກອນ ຢ່າງເປັນຂະບວນຟົດຟື້ນ. ເຊີ່ງສັງລວມແລ້ວນັກສຳມະນາກອນສາມາດຮັບເອົາບົດຮຽນ ທີ່ໄດ້ນຳສະເໜີ ໂດຍສະເລ່ຍ 95%.
     ເວລາ 13:30 ໂມງ ຂອງວັນທີ 16 ສິງຫາ 2018, ໄດ້ສຳເລັດການຝຶກອົບຮົມຕາມກຳນົດເວລາ ຈາກນັ້ນ ຄະນະ ຮັບຜິດຊອບການຝຶກອົບຮົມໄດ້ຂື້ນລາຍງານສະພາບການຝຶກອົບຮົມ, ໂດຍເຫັນວ່ານັກສຳມະນາກອນແມ່ນມິ ຄວາມເອົາໃຈໃສ່ຄົ້ນຄວ້າຮ່ຳຮຽນ, ປະຕິບັດໂມງເວລາໄດ້, ພ້ອມທັງຈັດພິທີມອບໃບຢັ້ງຢືນ ການຝຶກອົບຮົມ ໂດຍ ທ່ານ ຄຳສຸກ ຜົງສະໄໝ ຮອງຫົວໜ້າ ພະແນກ ປທສ ແຂວງ ໄຊສົມບູນ.
     ຫຼັງຈາກນັ້ນ ທ່ານ ສົມບູນ ສອນລິດທິເດດ ກຳມະການພັກແຂວງ, ເລຂາພັກເມືອງ, ເຈົ້າເມືອງ ເມືອງທ່າໂທມ ໄດ້ໃຫ້ກຽດມີຄຳເຫັນໂອ້ລົມ ຕໍ່ພິທິີການຝຶກອົບຮົມ, ພ້ອມທັງຮຽກຮ້ອງໃຫ້ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ສືບຕໍ່ນຳເອົາຄວາມຮູ້ ແລະ ປະສົບການອັນໃໝ່ເພື່ອມາຖ່າຍທອດໃຫ້ເມືອງທ່າໂທມ ໃນແຕ່ລະໄລຍະໃຫ້ຕໍ່ເນື່ອງ ແລະ ກ່າວປິດພິທີ ຝຶກອົບຮົມ ຢ່າງເປັນທາງການເວລາ 14:00 ໂມງ.
ພັດທະນາໂດຍ: ສູນບໍລິຫານລັດດ້ວຍເອເລັກໂຕຼນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ອີເມວ: mptwebmaster@mpt.gov.la, ໂທ: 021-316600.
ຄູ້ມຄອງ ແລະ ບໍລິການໂດຍ: ສູນຂໍ້ມູນຂ່າວສານແບບເອເລັກໂຕຼນິກແຂວງໄຊສົມບູນ, ອີເມວ: xaysomboun_ict@hotmail.com, ໂທ: 026-210015.