ສະຫະພັນແມ່ຍິງອ້ອມຂ້າງແຂວງໄຊສົມບູນ ໄດ້ຮັບການຍົກລະດັບຄວາມຮູ້ດ້ານໄອຊີທິ

     ສະຫະພັນແມ່ຍິງໜ່ວຍພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ໄດ້ເປີດຊຸດຝຶກອົບຮົມດ້ານໄອຊີທີ ໃຫ້ບັນດາສະມາຊິກແມ່ອ້ອມຂ້າງແຂວງ ໃນວັນທີ 25 ກໍລະກົດ 2018 ນີ້ ທີ່ສະໂມສອນເມືອງອະນຸວົງໂດຍການເປັນປະທານຮ່ວມຂອງ ສະຫາຍ ພູແກ້ວ ອິນທະວົງ ຫົວໜ້າພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງ ແລະ ສະຫາຍ ນາງ ສຸກດາວອນ ທໍ່ ປະທານສະຫະພັນແມ່ຍິງຂອງພະແນກດັ່ງກ່າວ, ມີສຳມະນາກອນຈາກບັນດາສະມາຊິກສະຫະພັນແມ່ຍິງອ້ອມຂ້າງແຂວງເຂົ້າຮ່ວມ.

     ຈຸດປະສົງຂອງຊຸດຝຶກອົບຮົມຄັ້ງນີ້ ແມ່ນເພື່ອເປັນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 63 ປີ ແລະ ເປັນການສ້າງຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງ ທັງເປັນການໂຄສະນາເຜີຍແຜ່ຄວາມຮູ້ຄວາມສາມາດໃນດ້ານໄອຊີທີ ໃຫ້ພະນັກງານເພດຍິງອ້ອມຂ້າງແຂວງໄດ້ຮັບຮູ້, ເຂົ້າໃຈ ແລະ ສາມາດນຳໃຊ້ລະບົບຄອມພິວເຕີເຂົ້າໃນວຽກງານຕົວຈິງໄດ້ຢ່າງຖືກຕ້ອງ ແລະ ສະດວກວ່ອງໄວຂື້ນກວ່າເກົ່າ. ຊຸດຝຶກອົບຮົມໃນຄັ້ງນີ້ ສຳມະນາກອນຈະໄດ້ຮຽນຮຸ້ກ່ຽວກັບການນຳໃຊ້ສື່ສັງຄົມອອນລາຍ, ການແກ້ໄຂບັນຫາຄອມພິວເຕີຂັ້ນພື້ນຖານ, ການສ້າງ ແລະ ການນຳໃຊ້ E-mail  ແລະ ການນຳໃຊ້ໂທລະສັບເຊື່ອມຕໍ່ກັບຄອມພິວເຕີ ໂດຍແມ່ນຄູຝຶກຈາກສູນບໍລິການຂໍ້ມູນຂ່າວສານແບບເອເລັກໂຕນິກ ຂອງພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງ ເປັນຜູ້ສິດສອນ ຖ່າຍທອດຄວາມຮູ້ໃຫ້. 
ພັດທະນາໂດຍ: ສູນບໍລິຫານລັດດ້ວຍເອເລັກໂຕຼນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ອີເມວ: mptwebmaster@mpt.gov.la, ໂທ: 021-316600.
ຄູ້ມຄອງ ແລະ ບໍລິການໂດຍ: ສູນຂໍ້ມູນຂ່າວສານແບບເອເລັກໂຕຼນິກແຂວງໄຊສົມບູນ, ອີເມວ: xaysomboun_ict@hotmail.com, ໂທ: 026-210015.