ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ແລກປ່ຽນບົດຮຽນ ກັບພະແນກໄປສະນີ​, ໂທລະຄົມມະນາຄົມ ແລະ ການສື່ສານ ແຂວງຊຽງຂວາງ

     ໃນວັນທີ 8 ມີຖຸນາ 2018, ພະແນກໄປສະນີ, ໂທລະຄົມມະນາຄົມແລະ ການສື່ສານ ແຂວງໄຊສົມບູນໄດ້ໄປແລກປ່ຽນບົດຮຽນກ່ຽວກັບວຽກງານໄປສະນີ, ໂທລະຄົມມະນາຄົມ ແລະ ການສື່ສານ ກັບພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງຊຽງຂວາງ ຢູ່ທີ່ຫ້ອງປະຊຸມຂອງຫ້ອງວ່າການແຂວງຊຽງຂວາງ. ໂດຍໃຫ້ກຽດເປັນປະທານຮ່ວມຂອງທ່ານ ພູແກ້ວ ອິນທະວົງ ຫົວໜ້າພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ແລະ ທ່ານ ຫວາຢ່າ ໝອກພູເຂົາ ຫົວໜ້າພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງຊຽງຂວາງ, ມີຮອງຫົວໜ້າພະແນກ, ຫົວໜ້າຂະແໜງ ແລະ ພະນັກງານວິຊາການທັງສອງແຂວງເຂົ້າຮ່ວມ.

     ກອງປະຊຸມຄັ້ງນີ້ທ່ານ ໄພທູນ ພົມມະຈັນ ຮອງຫົວໜ້າພະແນກ ປທສ ແຂວງຊຽງຂວາງໄດ້ຂື້ນຜ່ານບົດສະຫຼຸບກ່ຽວກັບການເຄື່ອນໄຫວ ແລະ ການຈັດຕັ້ງປະຕິບັດວຽກງານໃນໄລຍະຜ່ານມາຂອງພະແນກ ປທສ ແຂວງຊຽງຂວາງຕໍ່ກອງປະຊຸມ, ຫຼັງຈາກນັ້ນ ທ່ານ ພູແກ້ວ ອິນທະວົງ ຫົວໜ້າພະແນກ ປທສ ແຂວງໄຊສົມບູນກໍ່ໄດ້ຜ່ານບົດສະຫຼຸບການເຄື່ອນໄຫວ ແລະ ການຈັດຕັ້ງປະຕິບັດວຽກງານຂອງພະແນກ ປທສ ແຂວງໄຊສົມບູນ ຕໍ່ກອງປະຊຸມເຊັ່ນກັນ.
     ໂອກາດນີ້ທ່ານ ຫວາຢ່າ ໝອກພູເຂົາ ຫົວໜ້າພະແນກ ປທສ ແຂວງຊຽງຂວາງ ກໍ່ໄດ້ສະເໜີໃຫ້ພະນັກງານພະແນກ ປທສ ແຂວງຊຽງຂວາງ ແລະ ພະນັກງານພະແນກ ປທສ ແຂວງໄຊສົມບູນ ມີການສົນທະນາ, ແລກປ່ຽນບົດຮຽນຮ່ວມກັນຢ່າງຝົດຟື້ນ ແລະ ໄດ້ບົດຮຽນຫຼາຍສົມຄວນ.
     ໃນຕອນທ້າຍຂອງກອງປະຊຸມ ທ່ານ ຫວາຢ່າ ໝອກພູເຂົາໄດ້ມີຄຳເຫັນໂອ້ລົມຕໍ່ກອງປະຊຸມ ການພົບປະແລກປ່ຽນບົດຮຽນກ່ຽວກັບວຽກງານໄປສະນີ, ໂທລະຄົມມະນາຄົມ ແລະ ການສື່ສານ ເພື່ອໃຫ້ກອງປະຊຸມຄັ້ງນີ້ມີຄວາມໝາຍຄວາມສຳຄັນຍິ່ງຂື້ນ ແລະ ທ່ານ ຍັງໄດ້ກ່າວຂອບອົບ-ຂອບໃຈຕໍ່ຄະນະພະແນກ ປທສ ແຂວງໄຊສົມບູນທີ່ໄດ້ຕັດສິນໃຈເລືອກໄປທອດຖອນບົດຮຽນທີ່ພະແນກ ປທສ ແຂວງຊຽງຂວາງ ແລະ ຂໍໃຫ້ທັງສອງແຂວງສືບຕໍ່ຮ່ວມມືກັນ ແລະ ແລກປ່ຽນບົດຮຽນດ້ານວຽກງານກັນໃຫ້ຫຼາຍກວ່າເກົ່າ, ມີຄວາມສາມັກຄີກັນຢ່າງແໜ້ນແຟ້ນຍິ່ງໆຂື້ນ.
ພັດທະນາໂດຍ: ສູນບໍລິຫານລັດດ້ວຍເອເລັກໂຕຼນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ອີເມວ: mptwebmaster@mpt.gov.la, ໂທ: 021-316600.
ຄູ້ມຄອງ ແລະ ບໍລິການໂດຍ: ສູນຂໍ້ມູນຂ່າວສານແບບເອເລັກໂຕຼນິກແຂວງໄຊສົມບູນ, ອີເມວ: xaysomboun_ict@hotmail.com, ໂທ: 026-210015.