ສະຫະພັນແມ່ຍິງ ໜ່ວຍພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນຈັດກອງປະຊຸມເປີດຂະບວນການແຂ່ງຂັນ 3 ດີ

     ກອງປະຊຸມ ເປີດຂະບວນການແຂ່ງຂັນ 3 ດີ ຂອງສະຫະພັນແມ່ນຍິງໜ່ວຍພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງໄຊສົມບູນ ໄດ້ຈັດຂື້ນໃນຕອນບ່າຍຂອງວັນທີ 29 ພຶດສະພາ 2018 ນີ້ ທີ່ຫ້ອງປະຊຸມຂອງບໍລິສັດ-ລັດວິສາຫະກິດລາວໂທລະຄົມ ໂດຍການເຂົ້າຮ່ວມເປັນປະທານຂອງສະຫາຍ ພູແກ້ວ ອິນທະວົງ ເລຂາໜ່ວຍພັກ ຫົວໜ້າພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ,​ສະຫາຍນາງ ຄຳສີ ສິດທິວໍລະດາ ປະທານສະຫະພັນແມ່ຍິງແຂວງ ແລະ ສະຫາຍນາງ ສຸກດາວອນ ທໍ່ ປະທານສະຫະພັນແມ່ຍິງໜ່ວຍພະແນກ ປທສ ແຂວງ ພ້ອມດ້ວຍສະຫະພັນແມ່ຍິງຈາກພະແນກການ, ອົງການ, ກົມກອງອ້ອມຂ້າງແຂວງເຂົ້າຮ່ວມ.

     ໂອກາດນີ້ ສະຫາຍນາງ ສຸກດາວອນ ທໍ່ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຂະບວນການແຂ່ງຂັນ 3 ດີ ໃນໄລຍະຜ່ານມາ ແລະ ວາງທິດທາງການເຄື່ອນໄຫວໃນຕໍ່ໜ້າ. ພ້ອມທັງຮັບຟັງການຜ່ານແຜນການເຄື່ອນໄຫວການຈັດຕັ້ງປະຕິບັດ ຂໍ້ແຂ່ງຂັນ 3 ດີຂອງສະຫະພັນແມ່ຍິງໜ່ວຍພະແນກໄປສະນີ, ໂທລະຄົມມະນາຄົມ ແລະ ການສື່ສານ. ຈາກນັ້ນ ເອື້ອຍນ້ອງສະມາຊິກສະຫະພັນແມ່ຍິງພາຍໃນພະແນກ ໄດ້ຈັບມືກັນຮັບຮອງເອົາການແຂ່ງຂັນ ຢ່າງເປັນທາງການ. ກອງປະຊຸມຄັ້ງນີ້ ຍັງເປັນການຜັນຂະຫຍາຍເນື້ອໃນຈິດໃຈ ມະຕິກອງປະຊຸມໃຫຍ່ຜູ້ແທນແມ່ຍິງລາວທ່ົວປະເທດ ຄັ້ງທີ VII ແລະ ມະຕິກອງປະຊຸມຕົວແທນສະມາຊິກສະຫະພັນແມ່ຍິງ ແຂວງໄຊສົມບູນ ຄັ້ງທີ I ໃຫ້ປະກົດຜົນເປັນຈິງ ເພື່ອເຮັດໃຫ້ເນື້ອໃນຂໍ້ແຂ່ງຂັນ 3 ດີ ໄດ້ຮັບການຈັດຕັ້ງປະຕິບັດຢ່າງກວ້າງຂວາງ. ໃນໂອກາດທີ່ມີຄວາມໝາຍ-ຄວາມສຳຄັນນີ້ ສະຫາຍ ພູແກ້ວ ອິນທະວົງ ແລະ ສະຫາຍນາງ ຄຳສີ ສິດທິວໍລະດາ ໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງກ່ອນອື່ນທັງສອງສະຫາຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ຄວາມພາກພຽນພະຍາຍາມ ແລະ ຫ້າວຫັນ ຂອງເອື້ອຍນ້ອງສະຫະພັນແມ່ຍິງໜ່ວຍພະແນກໄປສະນີ, ໂທລະຄົມມະນາຄົມ ແລະ ການສື່ສານ ທີ່ໄດ້ສຸມທຸກສະຕິປັນຍາຂອງຕົນ ເຂົ້າໃນການຈັດຕັ້ງປະຕິບັດວຽກງານສະຫະພັນແມ່ຍິງ ດ້ວຍຄວາມຮັບຜິດຊອບສູງ ເວົ້າລວມ, ເວົ້າສະເພາະ ກໍຄືການປະຕິບັດຂໍ້ແຂ່ງຂັນ 3 ດີ ຈົນມີຜົນງານອັນພົ້ນເດັ່ນໃນຫຼາຍດ້ານ ພ້ອມນີ້ ທັງສອງສະຫາຍໄດ້ເນັ້ນໜັກໃຫ້ເອື້ອຍນ້ອງສະຫະພັນແມ່ຍິງ ຂອງພະແນກ ຈົ່ງຕັ້ງໜ້າປັບປຸງການຈັດຕັ້ງໜ່ວຍສະຫະພັນແມ່ຍິງໃຫ້ມີຄວາມໜັກແໜ້ນ-ເຂັ້ມແຂງ, ປັບປຸງແບບແຜນວິທີການຊີ້ນຳ-ນຳພາ, ແບບແຜນວິທີການເຮັດວຽກຂອງໜ່ວຍຕາມພາລະບົດບາດ, ໜ້າທີ່ ແລະ ຂອບເຂດສິດຂອງຕົນເພື່ອໃຫ້ຂະບວນການແຂ່ງຂັນ 3 ດີ ບັນລຸຕາມຈຸດປະສົງ ແລະ ແຜນການທີ່ວາງໄວ້
ພັດທະນາໂດຍ: ສູນບໍລິຫານລັດດ້ວຍເອເລັກໂຕຼນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ອີເມວ: mptwebmaster@mpt.gov.la, ໂທ: 021-316600.
ຄູ້ມຄອງ ແລະ ບໍລິການໂດຍ: ສູນຂໍ້ມູນຂ່າວສານແບບເອເລັກໂຕຼນິກແຂວງໄຊສົມບູນ, ອີເມວ: xaysomboun_ict@hotmail.com, ໂທ: 026-210015.