ຫ້ອງວ່າການສຳນັກງານນາຍົກລັດຖະມົນຕີ ສົມທົບກັບຫ້ອງວ່າການປົກຄອງແຂວງ, ພະແນກ ປທສ ແຂວງ, ພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ແຂວງ ເປີດຝຶກອົບຮົມ ການຂຽນຂ່າວ, ການສ້າງ ແລະ ຄຸ້ມຄອງ ເວັບໄຊ້

      ໃນຕອນເຊົ້າ ວັນທີ 18 ທັນວາ 2017 ໄດ້ເປີດບັ້ນຝຶກອົບຮົມ ການຂຽນຂ່າວ, ການສ້າງ ແລະ ຄຸ້ມຄອງ ເວັບໄຊ້ ຢູ່ແຂວງໄຊສົມບູນ ຂື້ນ ຢູ່ທີ່ຫ້ອງສູນຂໍ້ມູນຂ່າວສານແບບເອເລັກໂຕຣນິກ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງ ໂດຍການເປັນປະທານຮ່ວມຂອງ ຮສ. ປອ. ສົມກຽດ ພະສີ, ຫົວໜ້າ ກົມປະຊາສຳພັນຫ້ອງວ່າການສຳນັກງານນາຍົກລັດຖະມົນຕີ ແລະ ທ່ານ ສົມບູນ ຄຳຕາງ, ຮອງຫົວໜ້າ ຫ້ອງວ່າການ ປົກຄອງ ແຂວງໄຊສົມບູນ, ນອກນີ້ຍັງມີບັນດາ ທ່ານ ຫົວໜ້າ, ຄະນະກົມ ຈາກຫ້ອງວ່າການສຳນັກງານນາຍົກ ລັດຖະມົນຕີ, ຫົວໜ້າຄະນະ ພະແນກ ປທສ ແຂວງໄຊສົມບູນ  ພ້ອມດ້ວຍວິທະຍາກອນ ທີ່ມາຈາກສູນກາງ ແລະ ນັກສຳ ມະນາກອນ ຂອງຫ້ອງວ່າການ ປົກຄອງແຂວງໄຊສົມບູນ, ພະແນກຖະແຫຼງຂ່າວ ,ວັດທະນາທຳ ແລະ ທ່ອງທ່ຽວແຂວງ ແລະ  ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ   ເຂົ້າຮ່ວມ ພິທີດັ່ງກ່າວ ລວມທັງໝົດ 17 ທ່ານ.

    

      ໂອກາດນີ້ ທ່ານ ຮສ. ປອ. ສົມກຽດ ພະສີ ໄດ້ໃຫ້ກຽດມີຄຳເຫັນຕໍ່ພິທີ ຊຶ່ງທ່ານໄດ້ ຍົກໃຫ້ເຫັນຄວາມ   ໝາຍ-ຄວາມສຳ ຄັນ ຕໍ່ການສ້າງ ແລະ ຄຸ້ມຄອງເວັບໄຊ້ ເນື່ອງຈາກວ່າປັດຈຸບັນ ເປັນຍຸກທີ່ມີຄວາມທັນສະໄໝ ທາງດ້ານເຕັກໂນໂລຊີ ສະນັ້ນ ຈຶ່ງມີຄວາມຈຳເປັນໃນການໝູນໃຊ້ສື່ເອເລັກໂຕຣນິກ ເຂົ້າໃນການເຄື່ອນໃຫວວຽກງານທາງລັດຖະການ ໃຫ້ ມີຄວາມສະດວກສະບາຍຍິ່ງຂື້ນ.    ພ້ອມນິ້ ທ່ານຍັງໄດ້ຮຽກຮ້ອງໃຫ້ ວິທະຍາກອນ ຈົ່ງສຸມທຸກຄວາມສາມາດ ແລະ ສະຕິປັນຍາຂອງຕົນ ເຂົ້າໃນການຝຶກອົບຮົມ ຄັ້ງນີ້ ໃຫ້ມີຄຸນນະພາບ ແລະ ປະສິດທິຜົນສູງການເປິດບັ້ນຝຶກອົບຮົມ ຄັ້ງນີ້ແມ່ນເພື່ອ ຝຶກທັກສະໃຫ້ພະນັກງານລັດຖະກອນ ເວົ້າລວມ, ເວົ້າສະເພາະ ກໍ່ຄື ຫ້ອງວ່າການປົກຄອງ ແຂວງ, ພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ພ້ອມດ້ວຍ ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ໃຫ້ມີຄວາມຊຳນານໃນການຂຽນຂ່າວ, ການສ້າງ ແລະ ຄຸ້ມຄອງເວັບໄຊ້ ເພື່ອກ້າວສູ່ຄວາມທັນສະໄໝ ເທື່ອລະກ້າວ ສ້າງຄວາມສະດວກໃຫ້ແກ່ການຕິດຕໍ່ພົວພັນວຽກງານຕ່າງໆ ພາຍໃນແຂວງ ໃຫ້ມີຄວາມວ່ອງໄວ-ທັນສະໄໝ ແລະ ທັນເຫດການ.

    

    ຈາກນັ້ນ ທ່ານ ຫົວໜ້າກົມປະຊາສຳພັນ ຫ້ອງວ່າການສຳນັກງານນາຍົກລັດຖະມົນຕີ, ທ່ານ ຮອງຫົວໜ້າ ຫ້ອງວ່າການປົກຄອງແຂວງໄຊສົມບູນ, ທ່ານ ຫົວໜ້າຄະນະ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ພ້ອມດ້ວຍຄະນະ ກໍ່ໄດ້ ພັກປ່ຽນກັນຂື້ນມາມີຄຳເຫັນເພື່ອ ແລກປ່ຽນຄຳເຫັນກ່ຽວກັບສະພາບການນຳໃຊ້ລະບົບ ໄອຊີທີ ໃນການບໍລິຫານວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.

         

ພັດທະນາໂດຍ: ສູນບໍລິຫານລັດດ້ວຍເອເລັກໂຕຼນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ອີເມວ: mptwebmaster@mpt.gov.la, ໂທ: 021-316600.
ຄູ້ມຄອງ ແລະ ບໍລິການໂດຍ: ສູນຂໍ້ມູນຂ່າວສານແບບເອເລັກໂຕຼນິກແຂວງໄຊສົມບູນ, ອີເມວ: xaysomboun_ict@hotmail.com, ໂທ: 026-210015.